فوزیہ بشیر ایڈووکیٹ

مکرمی! سابقہ دور حکومت کے خود کو ناگزیر سمجھنے والے صدرپرویز مشرف نے برملا تسلیم کیا ہے کہ عدلیہ کے ساتھ متصادم رویہ میری غلطی تھی۔ میں نے کسی دانشور کا قول پڑھا تھا کہ بڑے آدمی کی چھوٹی غلطی بھی بہت بڑی ہوتی ہے۔ مشرف صاحب کی چھوٹی سی غلطی نے وطن عزیز میں غیر یقینی معاشی ابتر صورتحال کے سابقہ تمام ریکارڈ توڑ دیئے۔ اس ضمن میں مہنگائی، لاقانونیت، بنیاد ی ضروریات زندگی سے متعلق بحرانوں نے بھی سابقہ تمام ریکارڈ توڑ دیئے۔ ابھی تو ان تمام حکومتی ظلموں سے چور عوام اٹھ بھی پائی ہے کہ صدر جناب آصف علی زرداری نہ جانے کن مشیروں اور وزیروں کے مشورے سے دوبارہ عدلیہ کے ساتھ متصادم رویہ اپنا رہے ہیں۔ حالانکہ بطور پاکستانی صدر وہ وطن عزیز اس کے عوام اس کے اثاثے کے امین ہیں عوام کے مسائل کو حل کرنے کے ذمہ دار ہیں۔ سابقہ حکومتوں کی غلط پالیسیوں کا ازالہ کرنے کے لئے انہوں نے یہ اہم ذمہ داری قبول کی ہے۔ افسوس صد افسوس یہ وہ وقت ہے جب وطن عزیز ہر طرف سے دشمنوں سے گھرا ہوا ہے وطن کے دشمنوں کا حل کبھی قرض اور بھیک مانگ کر نہیں ہوتا اور نہ ہی نچڑی ہوئی عوام کا مزید کچومر نکال کر، نہ ہی اپنے ہی ملک کے اعلیٰ اداروں بالخصوص عدلیہ کے ساتھ مسلسل متصادم رویہ اختیار کر کے حیرت اور افسوس کا مقام یہ ہے کہ جناب صدر آصف علی زرداری سے ایک دانشور اور خاص طبقے کو خاص توقعات تھیں کہ یہ عوامی صدر وطن عزیز کو مضبوطی اور عوام کو حقیقی ریلیف دینے میں اہم کردار ادا کریں گے۔ جبکہ معاملہ اس کے بالکل برعکس ہے۔ بالخصوص 8 جولائی اور 9 جولائی کا دو ملکی بڑے اداروں میں متصادم رویہ ملک وقوم کے لئے انتہائی خطرناک ہو سکتا ہے یہ سلسلہ صدر محترم نے عدالت کے تیل کی کمی کے فیصلے کا مذاق اڑا کر شروع کیا۔ 

وہ وقت بھی دیکھا ہے تقدیر کی گردش نے لمحوں نے خطا کی تھی صدیوں نے سزا پائی